لماذا لن نقاطع الانتخابات

قبل أي كلام لازم نكون متفقين أن مقاطعة الانتخابات بدون مشاركة على نطاق واسع بتكون عديمة الفائدة ، زي ال حصل ف انتخابات مجلس الشورى كده ، العدد ال شارك كان قليل جداً و كان واضح رفض الشارع لمجلس الشورى و انتخاباته .

و بما أن الوضع في الشارع يدل على أن انتخابات الرئاسة ستشهد اقبال شعبي كبير يبقى المقاطعة بلا قيمة .

البعض يرى أن المقاطعة حتى لا نعطي المجلس العسكري شرعية .. أي شرعية تلك ؟

الاستفتاء على التعديلات الدستورية و أغلبية الأصوات بنعم أعطت شرعية للتعديلات الدستورية و بس ، انتخابات مجلس الشعب أعطت الشرعية للمجلس و نوابه بصفتهم ممثلي الشعب و بس ، انتخابات الرئاسة ستعطي الشرعية للرئيس الفائز و بس ، بلاش نردد كلام محسن شاهين و اللواءات التانيين ال بيحاولوا يفرضوا نفسهم ع الشعب بأي طريقة فاخترعوا موضوع الشرعية ده .

التزوير ... أيوا حضرتك أنا شايف العسكر عايزين مرشح رئاسي معين و هيحاولوا يزوروا النتيجة و هنزل انتخب عشان امنعهم ... أيوا هنتخب عشان امنعهم لأن كل ما عدد الناخبين بيزيد عملية التزوير بتبقى أصعب ، يعني بدل ما يسرق صوت 10 مواطنين هيكون مُطالب أنه يسرق أصوات 10 مليون مواطن ، تفتكر ال 10 مواطنين أو العشرة مليون مواطن هيقبلوا بالتزوير .. أكيد لأ بس ال 10 مليون يقدروا يحتجوا و يكون لهم رد فعل أقوى بكتير من ال 10 مواطنين لوحدهم ، عشان كده كل ما العدد يزيد التزوير بيكون أصعب ، حتى أن التزوير قد لا يتم خوفاً من الغضب الشعبي الواسع من الناخبين .
و لضمان عدم التزوير هننزل كلنا سواء متابعين ، مندوبين أو حتى ناخبين هنراقب الانتخابات و هنمنع التزوير .

لو هتقاطع الانتخابات لأنك شايف أن كده ضميرك هيكون مرتاح ياريت تسأل نفسك لو عمرو موسى أو أحمد شفيق كسبوا الانتخابات ضميرك هيكون مرتاح بردو ولا لأ ، ضميرك هيكون مرتاح أن أمهات فقدوا أبناءهم و أطفال فقدوا أباءهم عشان نظام مبارك يرجع ، الانتخابات جزء من الثورة ، ينجح مرشح ثوري و نستكمل الثورة أو ينجح مرشح فلول و يستمر مسلسل إجهاض الثورة .

يمكن المرشحين مش عاجبينك بس واحد منهم لازم يكون رئيس الجمهورية القادم عشان كده حضرتك بصفتك مواطن مصري واجبك أنك تختار أصلحهم و أفضلهم ، أتمنى أن حضرتك تفكر ف الكلام ده و تقوم بواجبك كمواطن مصري حر شريف و ربنا - إن شاء الله - يولي من يصلح .

دامت مصرنا للثورة و ثورتنا لمصر .... المجد للشهداء